Looking Beyond the Horizon

715. Ano ang "moral na pamumuhay" para sa Kristiyano?
Ang Kristiyanong moral na pamumuhay ay pagsunod kay Kristo:
• sa lahat ng ating mga pang-araw-araw na mga pagkilos, mga pagpahalaga at mga asal,
• pinalalakas sa pamamagitan ng mapagpalaya at mapagpanibagong presen-siya ni Kristo,
• sa pamamagitan ng biyaya ng kanyang Espiritu,
• sa loob ng sambayanang Kristiyano.
Ito'y isang pagtugon lamang sa tawag ng Ebanghelyo na maging mga taong mapagmahal, sa kaganapan ng buhay-kasama-ng-iba-sa-sambayanan sa harap ng Diyos, bilang pagtulad kay Kristo.

1743. "Niloob ng Diyos na ang tao ay bigyan ng sariling layang makapili (cf. Sir 15:14), upang sa sarili niyang desisyon ay hanapin niya ang Diyos na Lumikha, at buong laya ay makamit ang ganap at pinagpalang perpeksiyon sa pagkapit sa Kanya" (GS 17 #1).

1744. Ang kalayaan ay kapangyarihan na umakto o hindi umakto, at dahil dito ay gawin ang sarili't pinag-isipang kilos. Ang kalayaan ay nagiging ganap lang ang perpeksiyon kung nakatuon sa Diyos, ang pinakadakilang Kabutihan.

1745. Kalayaan ang naglalarawan sa angkop at makataong kilos o akto. Dahil sa kalayaan, ang tao ay nagiging responsable sa mga aktong ginawa niya. Ang kanyang mga pinag-isipang kilos ay sadyang mula lamang sa kanya.

1746. Ang bigat ng tungkulin o responsibilidad para sa isang aksiyon o ginawa ng tao ay maaaring gumaan o mawala, dahil sa kamangmangan, puwersa, takot at iba pang sikolohikal o panlipunang dahilan.

1747. Ang karapatan upang gamitin ang kalayaan, lalo na sa mga bagay na relihiyoso o moral ay di-maaalis na katangian ng dangal ng tao. Subalit ang paggamit ng kalayaan ay di-nangangahulugan ng pinaniniwalaang karapatan na sabihin o gawin ang alinman.

1748. "Para sa kalayaan, pinalaya tayo ni Kristo" (Gal 5:11).